Saturday, January 17, 2009

പ്രാര്‍ത്ഥന

എവിടെ മാനസം നിര്‍ഭയമാകുന്നു
എവിടെ മാനവരുന്നത ശീര്‍ഷരാം
എവിടെ വിജ്ഞാനം വിഘ്‌നമില്ലാതെഴും
എവിടെയേകമാം ലോകം ലസിക്കയാം
മുക്തി തന്റെയാ സ്വര്‍ഗ്ഗരാജ്യത്തിലേ-
ക്കെന്റെ നാടൊന്നുണരണേ ദൈവമേ

എവിടുലകു ശകലിതമാകില്ല
കപട ക്ഷുദ്രമാം കല്‍മതില്‍ കെട്ടിനാല്‍

എവിടെ വാക്കുകള്‍ സത്യത്തിനാഴിതന്‍
ഗഹനഗര്‍ത്തത്തില്‍ നിന്നുയരുന്നുവോ

എവിടെയക്ഷീണ യത്‌നം നിരന്തരം
പൂര്‍ണ്ണതക്കായുയര്‍ത്തുന്നു കൈത്തലം

എവിടെ മൂഢാചാര മരുഭൂവില്‍
യുക്തിയാം സ്‌ഫടിക നീരൊഴുക്കൊട്ടുമേ വറ്റിടാ

എവിടെ മാനസം നിര്‍ഭയമാവുന്നു
എവിടെ മാനവരുന്നത ശീര്‍ഷരാം
എവിടെ ചിത്തം പ്രഭോ നീ നയിക്കുന്നു
ചിര വികസിത പുണ്യ ചൈതന്യമായ്‌
മുക്തി തന്റെയാ സ്വര്‍ഗ്ഗരാജ്യത്തിലേ-
ക്കെന്റെ നാടൊന്നുണരണേ ദൈവമേ !

-ഗീതാജ്ഞലി

വിവ : സുഗതകുമാരി


1 comments:

gopakumarpb April 2, 2016 at 9:33 PM  

വളരെ നന്ദി!

Post a Comment

  © Blogger template The Business Templates by Ourblogtemplates.com 2008

Back to TOP